ანბანის კოშკი

ბათუმის ყველა ქანდაკება, მონუმენტი და არქიტექტურული ნაგებობა სიმბოლური მნიშვნელობის მატარებელია. ასე გამოხატეს ბათუმელებმა სიყვარული და პატივისცემა საკუთარი ანბანისადმი – ქალაქის ერთ-ერთ გამორჩეულ ადგილას, „საოცრებათა პარკი“-ს ტერიტორიაზე, აღიმართა უზარმაზარი ქართული ანბანის კოშკი.

ეს 130-მეტრიანი კონსტრუქცია, რომელიც სპირალის ფორმით დნმ-ის მოლეკულას მოგაგონებთ, ხაზს უსვამს ქართული დამწერლობის უნიკალურობასა და ეროვნულ მნიშვნელობას. კოშკის ავტორი, ესპანელი არქიტექტორი ალბერტო დომინგო კაბო, ცდილობდა ეჩვენებინა, რომ ენა ნებისმიერი ერის გენეტიკური კოდია, რომლის დაცვა და შენარჩუნება განსაკუთრებულ ყურადღებას იმსახურებს.

თავდაპირველი პროექტის მიხედვით, კოშკი არა მხოლოდ ბათუმის ერთ-ერთი მთავარი ღირსშესანიშნაობა უნდა ყოფილიყო, არამედ მრავალფუნქციურ სივრცედაც უნდა ქცეულიყო. იგეგმებოდა ობსერვატორიის, ტელესტუდიის ან მოძრავი რესტორნის გახსნა, რომელიც თავისივე ღერძის გარშემო იბრუნებდა. თუმცა, გეგმებში შეიცვალა და დღესდღეობით მინის გუმბათში მხოლოდ რესტორანი ფუნქციონირებს.

რა უნდა იცოდეთ?

• რესტორანი – იხილეთ აქ
• სამგზავრო ლიფტი – გადაადგილება მხოლოდ ლიფტითაა შესაძლებელი, რომელიც თავის მხრივ შემინულ პანორამულ კონსტრუქციას წარმოადგენს. პირველით ქვედა დონეზე ადიხართ, მეორეთი – კოშკის წვეროში.

ადგილზე ასევე დაგხვდებათ ინტერაქტიული ეკრანები, სადაც საქართველოს ღირსშესანიშნაობებზე ინფორმაცია შეგიძლიათ იხილოთ, ძველი ბათუმის ფოტოები და მიმოხილვითი სივრცე, რომელიც პანორამულ ხედებს გთავაზობთ.

ქართული ანბანის კოშკი უნიკალური ნაგებობაა, რომელსაც მსოფლიოში ანალოგი არ აქვს. ამიტომ, ის ნამდვილად ღირს ნახვად, განსაკუთრებით ღამით, როცა ასობით განათებული ასო ქართულ ენას კიდევ უფრო დიდებულ იერს ანიჭებს.